AarthikBikash
शुक्रबार, मंसिर २३, २०७९
  • होमपेज
  • ब्रेक्इङ न्युज
  • एक महिनामा १ अर्ब ७२ करोडको विद्युत भारत निर्यात

एक महिनामा १ अर्ब ७२ करोडको विद्युत भारत निर्यात

  • शुक्रबार, असार १७, २०७९
एक महिनामा १ अर्ब ७२ करोडको विद्युत भारत निर्यात

असार १७, काठमाडौं ।

काठमाडौं । नेपाल विद्युत प्राधिकरणले भारतीय ऊर्जा एक्सचेन्ज (आइएक्स) मार्केटमा प्रतिश्पर्धी दरमा बिजुली बेचेर १ अर्ब ७२ करोड रुपैयाँ बढी आम्दानी गरेको छ।

विद्युत प्राधिकरणका प्रबन्ध निर्देशक कुलमान घिसिङका अनुसार १७ करोड ८१ लाख ९१ हजार युनिट विद्युत भारतीय बजारमा बिक्री गरेर खुद नाफा १ अर्ब ७२ करोड ३० लाख रुपैयाँ कमाइएको हो । प्रतिस्पर्धी बजारमा बिक्री गरिएको विद्युतको औसत प्रति युनिट दर ९ रुपैयाँ ६७ पैसा छ ।

प्राधिकरणले जेठ १९ बाट भारतीय बजारमा विद्युत निर्यात सुरु गरेको थियो। ६ वटा जलविद्युत आयोजनाबाट उत्पादित विद्युतलाई स्रोत मानी ३६४ मेगावाट विद्युत आईईएक्स मार्केटमा बिक्री गर्न प्राधिकरणले स्वीकृति पाएको छ । आईईएक्समा २४ घण्टालाई १५/१५ मिनेटको ९६ वटा स्लटमा विभाजन गरी बजारले तय गरेको प्रतिस्पर्धी दरमा विद्युतको कारोबार गरिन्छ ।

प्राधिकरणले यस एक महिनाको अवधिमा विद्युत बिक्रीको औसत दर सबैभन्दा बढी असार १ मा प्रतियुनिट औसत दर १५ रुपैयाँ ९३ पैसा पाएको थियो भने सबैभन्दा कम औसत दर असार ७ मा प्रतियुनिट ४ रुपैयाँ ९२ पैसा ताेकिएकाे थियो । त्यसैले हरेक समयको मूल्य फरक–फरक हुने गरेको छ ।

भारतको केन्द्रीय विद्युत् प्रणाली अन्तर्गत दैनिक विद्युत् बजार (डे अहेड मार्केट) मा विद्युत बिक्री गरिन्छ। प्राधिकरणले हरेक दिन बिहान १० बजेदेखि मध्याह्न १२ बजेसम्म एक्सचेन्ज बजारमा बिक्री गरिने विद्युतको परिमाणसहित बिडमा प्रतिस्पर्धा छ। विद्युत प्रणालीमार्फत तय हुने ‘मार्केट क्लियरिङ प्राइस’का आधारमा विद्युतको प्रति युनिट बिक्री दर तय हुन्छ। प्रतिस्पर्धी दर तय भएपछि रातिको १२ बजेदेखि अर्को दिनको रातको १२ बजेसम्म अर्थात २४ घण्टा विद्युत निर्यात गरिन्छ।

प्राधिकरणका तर्फबाट एक्सचेन्ज बजारको सम्पूर्ण कारोबार नेपालसँगको विद्युत् व्यापारका लागि तोकिएको सम्पर्क निकाय एनटीपीसी विद्युत व्यापार निगम (एनभीभीएन)ले गर्छ। एनभीभीएनले हरेक दिनको कारोबार सम्बन्धी विवरण प्रत्येक दिन साँझ ६ बजे प्राधिकरणलाई पठाउँछ।

 

 

Facebook Comments

सम्बन्धित समाचार